Kabuleta atandise okukunga BannaUganda okulwanirira eby’obugagga ebili mu bitundu gye bawangaalira

EYAVUGANYAKO ku kifo ky’obukulembeze bwe Ggwanga Joseph Kabuleta atongozza ekisinde mwagenda okuyita okukunga bannaUganda bonna okufaayo okutumbula eby’obugagga ebili mu bitundu gye bawangalira.

Ekisinde kino Kabuleta akituumye National Economic Empowerment Dialogue (NEED) ne kigendererwa eky’okulaba okusooka nga akomyawo abantu bonna ab’esimbawo mu kulonda okwaggwa kyokka ne batawangula, era ne basigala mu bitundu gye baali babeera nga agamba nti bano basobolera ddala okukwatagana ne babaako kye bakola okutumbula eby’obugagga ebiri mu bitundu ebyo saako n’okulaba nga basitula omutindo gwe byenfuna eri abantu baabwe.

Agamba nti abantu bangi abalina amagezi amalungi tebasobola kuyitamu kufuna offiisi kyokka nga basobola okugasa e Ggwanga naddala okw’ogera ebiluma abantu babwe, nagamba nti bano beetaaga okuwulirizibwa era nabo ebilowoozo byabwe ebilungi biteekebwe mu nkola.

“Abantu ebitundu 65-70 abaali beesimbyewo tebayitamu, kitegeeza nti e Ggwanga telisobola kufiirwa magezi ge ge balina, ate naabo abayitamu ssi be basing abatayitamu kutegeera bintu bigenda mu maaso, kale twetaaga okubagatta awamu basobole okwogerera  ebitundu byabwe saako n’okutumbula eby’obugagga ebiri mu bitundu gye baali beesimbiddewo” Kabuleta bwe yagambye bwe yabadde atongoza ekisinde kino mu Kampala ku lw’okubiri.

Yanyonyodde nti bagenda kutambula Uganda yonna okujetolola nga basomesa abantu ebilingi ebiri mu kisinde kyabwe, era nga basuusira nti kino kigenda kukyusa entambula y’ebyobufuzi mu Ggwanga.

“Abantu ab’olubatu abafubye okwekomya eby’obugagga bwe Ggwanga lino bakoze kinene nnyo okwavuwaza bannaUganda ate nga kimanyiddwa nti omuntu omwavu taba namakulu mu kitundu gyabeera yadde mu kika kye, kyokka nga ebintu ebisobola okumufuula omugagga olumu biba bimuli kumpi nga tamanyi, kati tugenda kubalaga eby’obugagga byabwe ate tubayigirize butya bwe bayinza okubikuuma saako n’okubilabirira basobole okujjamu ensimbi ezibabezaawo” bwe yayongeddeko