Mu NRM nali noonyayo sente naye nga ndi wa DP kakongoliro, Chameleone

OMUYIMBI Yosefu Mayanja amanyiddwanga Chameleone avuddeyo natangaaza ku bigambibwa nti abuzabuza  nti wa DP kumbe munnaNRM kayingo, nagamba nti eri mu NRM yali agenzeeyo kunoonya sente naye nga ye munnaDP kakongoliro.

Mayanja olunaku lwe ggulo yayingiziddwa mu butongole mu kibiina kya Dp ku mukolo ogwabadde ku Sharing Hall e Nsambya, era nga yawerekeddwako n’abenganda ze bakira bajjuliza buli kadde nti bonna ba DP okwabadde ne nnyina amuzaala.

Ygambye abeetabye ku mukolo guno nti ekyamazima tabeerangako wa NRM era nti mu kibiina ekyo yagendayo kuyimba saako n’okufuna ensimbi nga omulimu gwe ogw’okuyimba kye gwali gumulagira mu kiseera ekyo, era naayimba ennyimba eziwaana Pulezidenti Museveni, naamusasula byonna ne biggwera awo.

“Bannange kati nsaba munzikirize nkomyewo eka mu kibiina kyange ne Famire yange bonna kye bakiririzaamu, eri nga omuntu omulala omukozi wa sente kye yandikoze nange kye nakola, Tubonga nawe naluyimba Museveni yansasula simubanja era sente nazifuna naye kati nkomyewo waka waffe mbasaba mumpandeko eddusu” Mayanja bwe yagambye.

Yanyonyodde nti abalowooza nti alina amalala ekyo ssi kituufu naye kino yakyesigamizza mu nsimbi ennyingi ze yafuna nga akyali muto myaka 19, nagamba nti naye kati yakula byonna yabissizza ebbali kati ayagala kufuuka mukulembeze.

Chameleone kigambibwa nti ayagala kwesimbawo ku bwa Loodi Meeya wa Kampala ekifo ekilimu Lukwago mu kiseera kino era nga ayagala Dp emukwase ebendera afune n’amaanyi okuva mu people Power awo alyoke alumbe.

Ye akulira ekibiina kya Dp mu ggwanga Norbert Mao bwe yabadde akwasa Chameleone obubonero okuli enkumbi saako ne bendera ye kibiina yagambye nti bagenda kwaniriza buli muntu yenna analaga obwetaavu nti ayagala okuyingira DP era bamuwagire.

Ku mukolo guno era baayingizza n’abadde munnaNRM Rev Peter Bakaluba Mukasa eyesogga Dp gye buvuddeko, nga ono agenda kuvuganya mu kifo ky’obwaSsentebe wa Disitulikiti ye Mukono.