ABABAKA abakazibwako okuba abayekera b’ekibiina ekiri mu buyinza ekya NRM baddukidde mu kkooti nga bagisaba esazeemu okusalibwawo okwakolebwa akakiiko k’ekibiina ak’okuntikko CEC, ku nsonga y’okuleka Ssentebe w’ekibiina kino Yoweri Kaguta Museveni yeesimbewo nga tewali amuvuganyizza, kye bagamba nti tekyali mu mateeka.
Kino kiddiridde nga 19 omwezi ogw’okubiri omwaka guno abakulembeze mu kibiina kya NRM ak’okuntikko okusalawo akatuula mu wooteeri ya Chobe Safari Lodge mu Disitulikiti ye Nwoya okusalawo nti Pulezidenti Museveni akomewo nga tavuganyiziddw munda mu kibiina mu kulonda kwa 2021, bano bagamba nti tekyali kituufu, kye bagamba nti bagala kkooti okusazaamu ekiteeso kino.
Baagala era kkooti esazeemu akakiiko ak’okuntikko ka CEC nga ekisanja kyako kyava mu gw’omusanvu omwaka gwa 2015 okutuuka mu 2020, nga bagamba nti kano tekalina buyinza kulangirira Museveni okukwatira ekibiina kya NRM ebendera, yadde akabondo k’ekibiina kya NRM, kye bagamba nti kino kikontana ne nnyingo 99 akatundu 3 mu Ssemateeka we Ggwanga.
Okwemulugunya kuno kwawereddwayo ababaka 11 okuli Theodore Ssekikubo (Lwemiyaga), Ms Monicah Amoding (Kumi District), Mr Barnabas Tinkasimire (Buyaga West), Mr John Baptist Nambeshe (Manjiya), Mr Patrick Nsamba Oshabe (Kassanda North), Mr Mbwatekamwa Gaffa (Kasambya).
abalala kwabaddeko Mr Samuel Lyomoki (Workers), Silvia Akello (Otuke), Ms Susan Amero (Amuria), Mr James Acidri (Maracha) ne Mr Moses Bildad Adome era nga bakiikiriddwa ba Puliida baabwe aba Alaka And Compony Advocates.
Akulira okulonda mu kibiina kya NRM Tanga Odoi bwe yatuukiriddwa ku nsonga eno yagambye nti tayinza kwogera ku nsonga ziri mu kkooti, naye natangaaza nti teyawulirako muntu yenna nti naye yali ayagala kuvuganya kubwa Ssentebe bwa kibiina okujjako Museveni yekka.
Do you have a story in your community or an opinion to share with us: Email us at editorial@watchdoguganda.com
