Entekateeka ya Pulezidenti Museveni ey’ebyobulimi n’obulunzi etandise okuvaamu ebibala

Bya Moses Kizito Buule

Enkola ya President Museveni empya mu lutalo ku bwaavu n’enjala mu maka eyesigamiziddwa ku kusomesa abalimi mu miruka okwetooloola eggwanga, eggiddwaako akawuuwo mu magombolola mwenda mu distulikiti y’e Mukono.

Okusinziira ku ntegeka eno, omulimi omu mu buli muluka ng’aweza yiika nnya wa kuyambibwa gavumenti okussaawo ebintu okugenda okusomosezebwa abalimi abalala, nga mu bino mulimu ebisolo, emmere, ebirime ebivaamu ensimbi n’enva endiirwa.

Omulimi ono nga wa kulondebwa abalimisa mu kitundu, ateekwa okuba omwetegefu okukkiriza abantu okusomera ku nnimiro ze, ateekwa okuba nga mwetegefu okusomesebwa, nga tajja kukyuusa birime oba ebisolo okutandikiddwa mu myaaka kkumi, era nga mwetegefu okukola endagaano ne gavumenti ku bino.

Obuyambi bw’agenda okufuna okuva mu gavumenti mulimu amagezi g’ekikuigu ag’obwereere, ebigimusa, eddagala ly’ebisolo n’ebirime, ebiyumba by’enkoko, embizzi n’ente, ebikozesebwa mu kulima n’okulunda ebirala.

Mu mboozi ey’akafubo ku lwokutaano mu kulambula abalimi mu ggombolola y’e Nama, akulira eby’obugagga ebikusike mu distulikiti Dr. Fred Mukulu nga y’avunaanyizibwa ku ntegeka eno mu distulikiti, yagambye nti abalimi mu magombolola mwenda bamaze okubangulwa era betegefu okutandika omulimu.

Mukulu agamba nti essira ligenda kussibwa ku mutindo gwa nnimiro n’ebiziovaamu nti kubanga ekigendererwa ekikulu kusobozesa bantu kuva mu bwaavu wamu n’enjala mu maka gaabwe.

Ku nkola eyagobereddwa mu kulonsda abagenda okutandika ennimiro z’okusomerako, Mukulu yagambye nti abalimisa baakoledde wamu n’abalimi benyinni okulonda abalimi abasinze okwetegeka entegeka eno.

ky’eby’obulimi, obulunzi n’obuvubi ky’ekitadde ensimbi mu ntegeka eno, sso nga ab’ekitongole kya OWC, abalimimisa n’abakulembeze ku distulikiti n’amagombolola be bagenda okugilondoola.

Omukwanaganya wa OWC mu Mukono eyomu mambuka Maj. Dick Kaweesa yasiimye gavumenti olw’entegeka eno, gye yagambye nti egenda okulinnyisa omutindo gw’ebikolebwa abazze bafuna ebintu bya OWC oluvanyuma lw’okutendekebwa.